शोभित बस्नेत प्रस्तुतकर्ता रहने सिनेमा ‘जय हो’मा निर्देशक फाइनल भएका छन् । सलोन सलिना फिल्म्स र निर्देशक टेक पौरखी राई बीच आज चलचित्र ‘जय हो’को निर्देशन टेक पौरखीले गर्ने बारे लिखित सम्झौता भएको छ। सलोन बस्नेत स्टारर चलचित्रलाई अब टेकले निर्देशन गर्ने भएका छन्।
निर्देशक राई एक कुशल चित्रकार हुन् । उनले कोरेका चित्र/तस्विरहरु विश्वव्यापी रुपमा बिक्रि हुने गरेका छन् । माघ अन्तिम देखी छायांकनमा जाने चलचित्रलाई काठमाडौँ, पोखरा, मुस्ताङ र अस्ट्रेलियामा खिचिनेछ ।
सुरेश न्यौपानेको कथा रहेको चलचित्रमा अहिलेसम्म सलोन मात्र फाइनल भएका छन् भने अन्य कलाकार र मुख्य अभिनेत्रीको छिट्टै टुंगो लाग्ने निर्माण पक्षले बताएको छ ।
एक्सन लभस्टोरी चलचित्रमा सागर आले मगरले संगीत भर्नेछन् । ‘जय हो’मा राज के अधिकारी र सुरज सरकारले लगानी गर्नेछन् । अधिकारी र सरकार जय हो बिजनेश ग्रुप र सनराइज ग्रुप अष्ट्रेलिया रकडेलका सञ्चालक हुन् । चलचित्रमा राम्जी राउत क्रियटिभ निर्देशक निर्देशकको रुपमा रहनेछन ।
