भदौ ३ गतेबाट प्रदर्शनमा आउन लागेको सौगात मल्ल र सृष्टि श्रेष्ठ प्रमुख भुमिकामा रहेको चलचित्र ‘माइकल अधिकारी’ एक रुपैयाँमा हेर्न पाइने भएको छ ।
चलचित्र माइकल अधिकारीलाई मोबाइल वालेट ईसेवाले एक रुपैयाँमा बुकिङ गर्न मिल्ने अफर ल्याएको हो । चलचित्र हेर्न चाहने दर्शक तथा ईसेवा प्रयोगकर्ताले आफ्नो नाम, ठेगाना, इमेल र अन्य विवरण सहित एक रुपैयाँ तिरेपछि चलचित्रको टिकट बुकिङ हुनेछ ।
उद्दव पौडेलको प्रस्तुतिमा निरक पौडेल निर्माता रहेको चलचित्रमा सौगात मल्ल, सृष्टि श्रेष्ठ, अशान्त शर्मा, लुनिभा तुलाधर, एनी कुँवर, हेमन्त बुढाथोकी, विद्या कार्की, दीलिप बोहोरा, केन्द्र भट्टराई, बाल कलाकारहरु आर्या पौडेल, केभिन परियारलगायतको अभिनय छ । शैलेश कँडेल क्षेत्रीको पटकथा तथा संवादमा तयार भएको चलचित्रको कथा लेखन र निर्देशन रञ्जित रौनियारको हो ।
मनोज केसी प्रोडक्सन म्यानेजर रहेको चलचित्रमा कमल राईसँगै कविराज गहतराजको कोरियोग्राफी, शम्भुजित बाँस्कोटा र रेभन सिंहको संगीत, शैलेश कँडेल क्षेत्री र दयाराम पाण्डेको शब्द रचना, मित्र डि गुरुङको सम्पादन र राजु विक्रम थापाको छायांकन छ । पूर्वको झापा र ईलाममा खिचिएको चलचित्रलाई नेपालको ठूलो प्रोडक्सन हाउस गोपीकृष्ण मुभिज प्रा.लीले निर्माण गरेको हो ।
