‘अमेरिका बोइज’निर्देशक प्रवेशको ‘बिहे पास’मा दयाहाङ र प्रकृति

चलचित्र ‘होस्टेल’ बाट अभिनेत्रीको रुपमा डेब्यू गरेकी प्रकृति श्रेष्ठले लामो समयपछि अभिनयमा कमब्याक गर्ने भएकी छन् । विवाहपछि श्रीमानसँगै अष्ट्रेलिया बस्न थालेकी उनी चलचित्र ‘बिहे पास’ बाट पर्दामा फर्किन लागेकी हुन् । समाजिक बिषयमा निर्माण हुने चलचित्रलाई प्रवेश पौडेलले निर्देशन गर्नेछन् । प्रबेशले यसअघि ‘अमेरिका बोइज’ निर्देशन गरेका थिए ।

रोहित कट्टेलको प्रस्तुति रहेको चलचित्रको कार्यकारी निर्माता रत्न श्रेष्ठ र सहनिर्माता ग्याल्जेन लामा छन् । आरआर फिल्म प्रोडक्शनको ब्यानरमा निर्माण हुने चलचित्रको छायांकन चैत्र पहिलो साताबाट सुरु हुने जानकारी निर्देशक पौडेलले दिएका छन् ।

तराई भेगमा खिचिने चलचित्रका अन्य कलाकार तथा प्राविधिकको चयन भने बाँकी रहेको बताइएको छ । चलचित्रको कथा आकाश बराल, सजन काफ्ले र मुरे केरले तयार पारेका हुन् भने पटकथा आकाश बराल र सजन काफ्लेको हो ।