दीपक रौनियारले निर्देशन गरेको चलचित्र ‘राजागंज’को नयाँ गीत ‘इन्द्रेणी’ सार्वजनिक गरिएको छ । निर्माणपक्षले आइतबार यो चलचित्रको गीत सार्वजनिक गरेको हो ।
सार्वजनिक गीतमा प्रवेश मल्लिकको संगीत, धिरेन्द्र प्रेमर्शीको शब्द र स्मारिका फुयाँलको स्वर छ । यो गीतको सेटअप मधेसको छ । गीतलाई चलचित्रको कथा वाचनको रुपमा प्रस्तुत गरिएको छ । गीतले मधेस र पहाडमा हुने गरेको विभेदलाई उठान गरेको छ ।
यसैबिच, यो चलचित्रको छायांकन स्थल जनकपुरमा यसको भव्य प्रिमियर समेत आयोजना गरिएको छ । जनकपुरमा रहेको गिरिजा हलमा ६ सय दर्शकको उपस्थितीमा भव्य प्रिमियर गरिएको हो ।
प्रिमियरमा जनकपुरका मेयरदेखि उच्च पदाधिकारीको उपस्थिती थियो । महिलाहरु पनि आँटिलो, जोशिलो अनी हिम्मतिलो हुनुपर्छ भन्ने यो चलचित्रले देखाएको अधिकांशको प्रतिक्रिया थियो ।
यो चलचित्रमा आशा मगराती, दयाहाङ राई, विजय बराल, ऋचा शर्मा, पशुपति राई, निकिता चण्डक, गौमाया गुरुङ लगायतका कलाकारहरुको अभिनय छ ।
