आउँदो महाशिवरात्रिलाई लक्षित गर्दै फागुन १४ गतेबाट प्रदर्शन हुने चलचित्र ‘फेरि रेशम फिलिली’ मा समावेश ‘फेरी जालमा’ सार्वजनिक गरिएको छ ।
बिहीवार काठमाडौं कमलपोखरीमा स्थित एक सिनेमा हलमा पत्रकार सम्मेलनको आयोजना गर्दै गीत सार्वजनिक गरिएको हो । सार्वजनिक गीतमा कालीप्रसाद बाँस्कोटाको संगीत, मानस राजको शब्द र गायनमा सङ्गीतकार बाँस्कोटा र सोमिया बराईली गायक छन् ।
करिब १० वर्ष अघि विसं २०७१ सालमा रिलिज गरिएको जालमा गीत भाइरल भएको थियो । यही गीतका कारण उक्त समयमा ‘रेशम फिलिली’ ले बक्सअफिसमा आक्रामक सुरुवात गरेको थियो । यो गीतको भिडियामा प्रदिप लामाको कोरियोग्राफी र शिवराम श्रेष्ठले छायांकन गरेका हुन् । सार्वजनिक ‘फेरि जालमा’ गीतमा यसका मुख्य कलाकार विनय श्रेष्ठ र सुपुष्पा भट्ट फिचर्ड छन् ।
अभिनेता श्रेष्ठले पुनः उही टिमसँग काम गर्न पाउँदा खुसी लागेको बताए । उनले भने, ‘पहिलाकै सङ्गीत टिमसँग काम गर्न पायौँ । यो गीत हामीले सक्दो राम्रो बनाउने प्रयाश गरेका छौँ, दर्शकको प्रतिक्रिया राम्रो पाउनेमा विश्वस्त छौँ ।’
उनले चलचित्रको सिक्वेल बनाउनुको कारण पहिलो भागको कथाको निरन्तरता रहेको बताए । चलचित्रलाई निरज महर्जनले निर्देशन गरेका हुन् । यसको कथा पनि उनले नै लेखेका हुन् । चलचित्रमा कामेश्वर, नीर शाह, प्रकाश घिमिरे, शिशिर वाङ्गदेल, रविन्द्र झा, लक्ष्मी गिरी, महेश त्रिपाठी, एवनराज उप्रेती, मेक्सम गौडेल, प्रकाश घिमिरे, सजन थापा लगायतको पनि अभिनय छ ।
सुसन प्रजापतीको छायांकन, निर्देशक महर्जन र आकाश बरालको पटकथा, नरेश किङ्ग योगीको द्वन्द्व निर्देशन तथा कालीप्रसाद बाँस्कोटा, एसडी योगी, हर्क साउद, जयन जे वाइवा र दीपक शर्माको संगीत र सुरेन्द्र पौडेलको सम्पादन चलचित्रमा रहेको छ ।
