यतिबेला जितु नेपाल चलचित्र ‘कार्साङ’को प्रचारमा दौडधुप गरिरहेका छन् । यो चलचित्रका मुख्य कलाकार दयाहाङ राई व्यस्त भएपछि जितुको दौडधुप बढी देखिएको छ।
यो चलचित्रको प्रचारका क्रममा कलाकार जितुले कलालाई पारिश्रमिकसँग तुलना नगर्ने बताएका छन् । उनले भनेका छन्–‘मैले चलचित्र साइन गर्दा नै निर्माता निर्देशकसँग पारिश्रमिकको बिषयमा बाहिर हल्ला गर्न नपाइने शर्त राखेको हुन्छु । म र मेरो टिमका केही मानिसहरुबाहेक अरुलाई मेरो पारिश्रमिकको बिषयमा थाहा नहोस् भन्ने म चाहन्छु । म कलालाई पारिश्रमिकसँग बाड्दिनँ ।’
जितुले आफ्ना सहकर्मी केदार घिमिरे ‘माग्ने बुढा’प्रति पनि टिप्पणी गरेका छन् । उनले अहिले केदारले आफूलाई पारिश्रमिकको कारण चर्चामा ल्याएका छन् । तर, जितु आफू कलालाई पारिश्रमिकसँग तुलना नगर्ने बताइरहेका छन् । एकातिर, केदार महंगो कलाकार भएकोमा खुशी देखिएका जितुले अर्कोतिर उनै केदारको पारिश्रमिकको हल्लामा व्यङ्ग्य गरेको सजिलै अनुमान लगाउन सकिन्छ ।
