नेपालगन्ज, केकी अधिकारीको होम प्रोडक्सनमा निर्माण भएको चलचित्र ‘बोक्सीको घर’ को थिम पोस्टर आज सार्वजनीक गरिएको छ । आगामी वर्षको वैशाखमा प्रदर्शनमा आउने भएको छ । ८ वर्षअघि मञ्चन भएको चर्चित नाटक ‘बोक्सीको घर’माथि रहेर यो चलचित्र निर्माण भएको हो ।
नाटककै लेखक एवं निर्देशक सुलक्षण भारतीले चलचित्रलाई निर्देशन गरेका हुन् । चलचित्रको शीर्ष भूमिकामा केकीले नै अभिनय गरेकी छन् । भने केकीको साथमा सुपला सापकोटा, श्वेच्छा राउत, सुलक्षण भारती, रमा थपलिया, सुष्मा निरौला, सबिन बास्तोला लगायतको अभिनय चलचित्रमा रहेको छ ।
महिलालाई बोक्सीको आरोप लगाई समाजले उनीहरूमाथि गर्ने शोषणको वरिपरि रहेर चलचित्र निर्माण भएको हो। सोसल–थ्रिलर जनरामा निर्माण भएको चलचित्रले समाजको कुप्रथालाई चित्रण गर्ने छ । नेपालसहित विभिन्न देशमा एकसाथ प्रदर्शनमा आउने चलचित्रलाई अन्तर्राष्ट्रिय फेस्टिभलमा समेत लैजाने योजना केकीको रहेको छ ।
लोचन रिजालको ब्याकग्राउण्ड म्युजिक रहेको चलचित्रलाई शिवराम श्रेष्ठले छायांकन, लोकेश बज्राचार्यले सम्पादन गरेका हुन् । भने टि फोल्क्स फिल्मस प्रा.लिले यो चलचित्रलाई वितरण गर्नेछ । बैशाख १४, ०८१ मा प्रदर्शनको तयारीमा रहेको चलचित्रको कार्यकारी निर्माता राजकुमार घिमिरे हुन् ।
