नेपालगन्ज – आउदो भदौ १४ गतेदेखि प्रदर्शनमा आउने चलचित्र ‘गणपति’को ‘टुकी झ्याप’ बोलको गीत सार्वजनिक भएको छ । आज काठमाडौंमा एक कार्यक्रमको आयोजन गर्दै सार्वजनिक गरिएको गीतमा निशान भट्टराई, अनिस अधिकारी र रचना रिमालको स्वर रहेको छ भने अनिस अधिकारीको शब्द रचना तथा कम्पोज छ ।
बाबुल गिरीले एरेन्ज गरेको गीतको भिडियोमा अभिनेत्री वर्षा सिवाकोटी बोल्ड अवतारमा प्रस्तुत छिन् । उनलाई मुकुन भुषालले साथ दिएका छन् । चलचित्रको गीतको अडियो पक्ष बलियो छ । केही समय अगाडि यही गीतको छायांकनको क्रममा बालाजुस्थित चलचित्र विकास संस्थानको ल्याबमा आगलागी भएको थियो । त्यसबाट निर्मातालाई लाखौंको क्षति भएको थियो । तर पछि नयाँ सेट तयार पारेर गीत खिचिएको थियो ।
सविन अधिकारीद्वारा निर्देशित ‘गणपति’ले आस्थाको रुपमा रहेका भगवान् र पृथ्वीमा उपस्थित मानिसबीचको फरक देखाउनेछ । चलचित्रमा मुकुनका साथै मेनुका प्रधान, स्वर्गीय जयनन्द लामा, कविता न्यौपाने, सूर्यमाला खनाल, प्रकाश घिमिरे, राजाराम पौडेल, पुष्कर गुरुङ, अंशु मानन्धर, कालु राना, टीका भक्त जिरेल, देवेन्द्र बब्लु, शुशील पोखरेललगायतको पनि अभिनय छ । रामप्रसाद रिजाल प्रस्तुतकर्ता रहेको चलचित्रको निर्मातामा लक्ष्मण रिजाल तथा कार्यकारी निर्मातामा विज्ञान केसी र अरविन्द्र गिरी रहेका छन् ।
