सविन अधिकारीले निर्देशन गरेको चलचित्र ‘गणपति’ को पोस्टर सार्वजनिक भएको छ। जेठ ५ गतेलाई चलचित्रको प्रदर्शन मिति तोक्दै चलचित्रको पोस्टर सार्वजनिक गरिएको हो। सार्वजनिक पोस्टरमा प्रमुख कलाकारद्वय मुकुन भुषाल र मेनुका प्रधान समावेश छन् भने गणेशको अनुहार झल्किने मुकुण्डो लगाएको व्यक्तिलाई अगाडि राखिएको छ।
निर्देशक अधिकारीका अनुसार चलचित्रले समाजलाई चित्रण गर्ने बताए। ‘कोही व्यक्ति कुनैबेला त्यही समाजको भगवान बन्छ भने सोही व्यक्तिलाई हाम्रै समाजले नरकीय व्यवहार गर्छ। त्यसकै वरपर यो चलचित्रको कथा घुमेको छ,’ उनले भने। चलचित्रकोकथा निर्देशक अधिकारी स्वयंले तयार पारेका हुन्।
आस्थाको रूपमा रहेका भगवान र भौतिक रूपमै पृथ्वीमा उपस्थित मानिसबीचको फरक देखाउने चलचित्रमा मुकुन र मेनुकासँगै कविता न्यौपाने, सूर्यमाला खनाल, जयनन्द लामा, प्रकाश घिमिरे, राजाराम पौडेल, पुष्कर गुरुङ, अंशु मानन्धर, कालु राना, टीका भक्त जिरेल, सुशील पोखरेल, देवेन्द्र बब्लुलगायत कलाकारको अभिनय छ। ‘गणपति’ नाम धार्मिक सुनिए पनि चलचित्रमा कुनै पनि धर्मको विरोध वा प्रचार नगरिएको निर्देशक अधिकारीले बताए।
यो चलचित्रको सम्पूर्ण छायांकन तनहुँको बन्दीपुर गाउँपालिका थारुवासमा गरिएको हो। एबिगम्यान फिल्म्स ब्यानरको चलचित्रमा लक्ष्मण थापाको लगानी छ। चलचित्रलाई हरिबहादुर घलेले छायांकन गरेका हुन्।
