रमेश एमके पौडेल निर्देशित पहिलो चलचित्र ‘तिम्रो मेरो साथ’को पोस्टर सार्वजनिक गरिएको छ । तिहारको अवसर पारेर आइतवार सार्वजनिक गरिएको पोस्टरमा चलचित्रका मुख्य अभिनेता पुष्प खड्का र अभिनेत्री साम्राज्ञी आरएल शाहलाई हट अवतारमा प्रस्तुत गरिएको छ ।
आगामी पुष २९ गतेलाई प्रदर्शन मिति घोषणा गरिएको यस चलचित्रको पहिलो गीत लक्ष्मीपूजाको अवसर पारेर सोमवार सार्वजनिक हुँदैछ । चलचित्रमा पुष्प र साम्राज्ञीका अलवा सन्दिप क्षेत्री, खड्क बहादुर पुन (खबपु), इमिली लामा, सरोज खनालको अभिनय छ भने विशेष भूमिकामा ध्रुव दत्तले अभिनय गरेका छन् । पुष्प र साम्राज्ञीले यसअघि चलचित्र ‘मारुनी’मा एकसाथ काम गरेका थिए ।
चलचित्रमा रमेश स्वंयमको कथा, गीत र निर्माण छ । आर्यन फिल्मस तथा बोधी एचडी अमेरिकाको ब्यानरमा निर्मित यस चलचित्रका निर्मातामा पासाङ लामा र सह-निर्मातामा निरू भण्डारी, अशोक पोखरेल, सुमन पौडेल र सुधिर पराजुली छन् । कार्यकारी निर्माता सविर श्रेष्ठको पटकथा र संवाद रहेको चलचित्रमा शिव ढकालको छायांकन र योगेश काजीको संगीत छ ।
