बडा दशैंको अवसर पारेर असोज २१ गतेबाट प्रदर्शनमा आएको चलचित्र ‘२ नम्बरी’ले बक्सअफिसमा राम्रो व्यापार गरिरहेको छ । दर्शकबाट ‘वर्ड अफ माउथ’ मिलेका कारण प्रदर्शनमा आएको आजको दिनसम्म पनि चलचित्रको व्यापारमा सिंगल थिएटर र मल्टीप्लेक्स दुवैतिर दर्शक अकुपेन्सी राम्रो छ ।
किरण नेपाली निर्माता रहेको चलचित्रले यतिबेला नाफाको ब्यापार गरिरहेको छ । यसैक्रममा निर्माता किरणका अनुसार निर्माणटिमले चलचित्र निर्माण गर्दा निक्कै दुःख गरेर काम गरेका प्राविधिकहरुलाई बोनस दिने घोषणा गरेको छ। चलचित्र सफल हुनुमा उहाँहरुको पनि ठूलो हात छ’ निर्माता नेपाली भन्छन्, बोनस कति दिने भन्ने अहिले पक्का छैन । तर चलचित्रले गर्ने लाइफ टाइम कलेक्शनको आधारमा बोनस दिन्छौं ।
दीपेन्द्र लामाको लेखन तथा निर्देशनमा तयार भएको चलचित्रमा उपासना सिंह ठकुरी, वुद्दि तामाङ, उगेन छोदेनको पनि मुख्य भूमिका रहेको छ । चलचित्र हेरेका अधिकांश दर्शकले सौगात मल्लको अभिनयको खुलेर तारिफ गरेका छन्।
