आउदो असोज ७ गतेबाट नेपाल र भारतमा एकसाथ प्रदर्शनमा आउने चलचित्र ‘प्रेमगीत ३’को हिन्दी भर्सनको टिजर सार्वजनिक भएको छ । भारतीय ट्रेड एनालिस्ट कोमल नाहटाले ट्विटरमार्फत् चलचित्रको हिन्दी टिजर सार्वजनिक गरेका हुन् । कारीब एक मिनेट लामो टिजर एक्सनले भरिएको छ ।
राजपरिवारमा जन्मिएको प्रेम (प्रदीप खड्का) लाई गीत (प्रेमिका) र राजगद्दीमध्ये एउटा रोज्नुपर्ने बाध्यतालाई टिजरमा देखाइएको छ । हिन्दीमा प्रदीपको भागको डबिङ संकेत म्हात्रेले गरेका हुन् । उनले साउथका कयौं सुपरस्टारको चलचित्रको हिन्दी डबमा आवाज दिइसकेका छन् । उनको बोल्ड आवाजले ‘प्रेमगीत ३’को टिजरलाई थप आकर्षक बनाएको छ । टिजरमा प्रदीप खड्कालाई एक्सन अवतारमा प्रस्तुत गरिएको छ ।
टिजर हेर्न यो लिंकमा जानुहोस्
https://www.facebook.com/chitrabhitraofficial/videos/455520679778718
यूट्युबमा भने यो चलचित्रको हिन्दी टिजर शनिवार दिउँसो १२ गते जी म्यूजिकबाट सार्वजनिक हुँदैछ भने नेपाली टिजर ओएसआर यूट्युब च्यानलमार्फत् सार्वजनिक हुनेछ । चलचित्रको हिन्दी टिजर सार्वजनिक गर्न निर्देशक तथा निर्माता सन्तोष सेन र अभिनेता प्रदीप खड्का बिहीवार मुम्बई उडेका थिए ।
स्वर्गीय छेतेन गुरुङ र सन्तोष सेनले संयुक्त रुपमा निर्देशन गरेको चलचित्रमा प्रदीपका अलावा अनुभव रेग्मी, सम्वृद्धि शाही ठकुरी, सुनिल थापा, सन्तोष सेन, माओत्से गुरुङ, पुस्कर कार्की, प्रेम पुरी, लक्ष्मी वर्देवा, योगिशा खत्रीलगायतका कलाकारहरुको पनि अभिनय रहेको छ । ‘प्रेमगीत ३’बाट क्रिस्टिना गुरुङले अभिनेत्रीको रुपमा डेब्यू गरेकी छन् भने चलचित्रको छायाँकार राजेश श्रेष्ठ हुन् ।
