अभिनेत्री ऋचा शर्माको मुख्य भूमिका रहेको चलचित्र ‘कौसीद’ले पोस्टर सार्वजनिक गर्दै प्रदर्शन मिति घोषणा गरेको छ । सोमबार सार्वजनिक पोस्टरमा आगामी जेठ २७ गतेलाई प्रदर्शन मिति तोकिएको छ । पोस्टरमा भने ऋचा पैसालाई अंगाल्दै देखिएकी छन् । वित्तिय ऋणको प्रभावमा परेको परिवारको कथा बोल्ने चलचित्रको केन्द्रीय द्वन्द्व पैसाकै वरिपरी घुमेको पोस्टरपे प्रस्ट्याउँछ ।
कुमार भास्करको निर्देशनमा बनेको चलचित्रमा ऋचासँगै भोलाराज सापकोटा, रुपेश दाहाल, परिक्षित विक्रम राणा, सदिक्षा गौतम, निर्भिक भट्टराई र सागर भट्टराई मुख्य भूमिकामा छन् । केदार भुसालको निर्माणमा तयार भएको चलचित्रको कार्यकारी निर्मातामा दिमेश श्रेष्ठ र सह-निर्मातामा लक्ष्मण बानियाँ रहेका छन् । चलचित्रको प्रस्तुतकर्तामा ऋचा शर्मा रहेकी छिन् ।
चलचित्रको कथा लेखन नव विजय प्रकाश श्रेष्ठ र धिर्जन थपलियाले गरेका छन् । निसाल पौडेलले छायांकन गरेको चलचित्रमा मित्र डि. गुरुङ र भिम विश्वकर्माको सम्पादन छ । बड पिक्चर्सको ब्यानरमा निर्मित चलचित्रको कोरोना महामारीका बीच छायांकन भएको थियो । आर.आर फिल्मसले फिल्मको वितरण अधिकार लिएको छ ।
