सलमान खान तथा आयुष शर्माको फिल्म ‘अन्तिम’ को ट्रेलर सार्वजनिक भएको छ । सलमान खानको प्रोडक्सनमा निर्माण भएको यो एक्शन फिल्ममा सलमान खान आफ्ना ज्वाईं आयुष शर्मासंग द्वन्द गरिरहेको देखिनेछ ।
फिल्मको ट्रेलरलाई समेत एक्सन प्रधान बनाइएको छ । सलमान खानका अन्य फिल्महरु झैं ‘अन्तिम’ पनि एउटा प्रहरी अधिकृतको कथा समेटिएको फिल्म हो, तर यसको कथामा केही ट्वीस्ट छ । फिल्ममा सलमान खान एक पञ्जाबी प्रहरी अधिकृतको भूमिकामा छन्, जो मुम्बईका एक गुण्डाको पछि लागेका छन् । आयुष शर्मा ती गुण्डा हुन्, जसलाई पक्राउन गर्ने दायित्व सलमानको हो ।
आयुष गरिवीबाट उठेका व्यक्ति हुन्, जो कालान्तरमा गुण्डागर्दीमा सक्रिय हुन्छन् । उनको उदेश्य इज्जतको रोटी होइन, थालभरीको खाना, त्यो पनि लुटेर खानु हो । सलमान खानले यी गुण्डालाई तह लगाउने तयारी गर्छन् । फिल्ममा एक्सनसहित रोमान्स तथा ड्रामा पनि हेर्न पाइने छ ।टेलिभिजन अभिनेत्री महिमा मकवानाले फिल्ममा आयुष शर्माको प्रेमिकाका भूमिका निर्वाह गरेकी छिन् ।
फिल्ममा सचिन खेडेकर तथा महेश मांजरेकर पनि महत्वपूर्ण भूमिकामा छन् । फिल्मलाई महेश मांजरेकरले नै निर्देशन गरेका हुन् । यो फिल्म ठिक एक महिनापछि अर्थात २६ नोभेम्बर, २०२१ का दिन प्रदर्शन हुनेछ ।
