‘मैंने प्यार किया’ फेम्ड निर्देशक सूरज बडजात्याको नयाँ फिल्म ‘उचाइँ’ को छायांकनका लागि बलिउडका चर्चित कलाकारहरु अनुपम खेर, बोमन इरानी, परिणिती चोपडा, सारिका हसन काठमाडौं आइपुगेका छन् । आइतवार विहान इन्डियन एयरलाइन्सको विमानबाट त्रिभुवन विमानस्थलमा अवतरण गरेका उनीहरुलाई बौद्धस्थित पाँचतारे होटल हायतमा बस्ने व्यवस्था मिलाइएको छ । नेपाल आउने क्रममा आकाशबाटै कैद गरेको काठमाडौंको भिडियो आफ्नो इन्स्टाग्राममा साझेदार गर्दै अनुपम खेरले स्तूपा र मन्दिरहरुको शहरमा लामो समयपछि आउन पाएकोमा खुसी व्यक्त गरेका छन् । उनी यसअघि २०७१ सालमा कोसेली स्कुलमा अध्ययनरत सुकुम्बासी र मजदुरका सन्तानलाई सहयोग जुटाउन आयोजित च्यारिटी शोमा सहभागी हुन नेपाल आएका थिए ।
‘उचाइँ’ को अधिकांश छायांकन हिमाली क्षेत्रमा गर्नुपर्ने भएकाले निर्देशक बडजात्याले नेपाललाई रोजेका हुन् । फिल्मको छायांकन स्थल हेर्न उनी दुईपटक नेपाल आएका थिए । यो फिल्ममा अमिताभ बच्चनको पनि अभिनय रहनेछ । तर, उनी भने नेपाल आउने छैनन् । स्वास्थ्य अवस्थाका कारण उनलाई परिवारले चिसो ठाउँमा पठाउन नमानेपछि उनीबाहेकको टिम नेपाल आएको हो । फिल्मलाई लुक्ला, लाङटाङ, मनाङ र मुस्ताङ लगायतका क्षेत्रमा छायांकन गरिनेछ । मित्रताको कथामा निर्माण हुन लागेको फिल्मको ४०-४५ दिनसम्म नेपालमा छायांकन हुनेछ । नानी गुप्ताको पनि मुख्य भूमिका रहने यस फिल्मको नेपाल व्यवस्थापन थ्री ह्विलर्स कम्पनी हेरेको छ । परिणिती पनि यसअघि फिल्म ‘सन्दिप और पिंकी फरार’ को छायांकनका लागि नेपाल आएकी थिइन् ।
