नेपालगन्ज- थ्री लेडी स्टारर एक्सन प्रधान नेपाली कथानक चलचित्र ‘आँधी तुफान-२’ को दुईवटा गीतको छायांकन सकिएको छ । गोवामा गीतको छायांकन सकेर शुटिङ युनिट नेपाल फर्किएको छ । आँधी तुफान-२ डेढ दशक अघि व्यावसायिक रूपमा सफल मानिएको चलचित्र ‘आँधी तुफान’ को सिक्वेल हो ।
नेपालमा शुटिङ सम्पन्न गरी चलचित्रको टिम गीत छाँयाकनका लागी गोवा पुगेको थियो । गीतको छायांकन सकेर शुटिङ युनिट नेपाल फर्किएको चलचित्रका निर्माता तथा लेखक मौनता श्रेष्ठले चित्रभित्रलाई जानकारी गराएका छन्।
चलचित्रको टाइटल गीतमा सिवानी मोक्तानको स्वर रहेको छ भने संगीत सुरेश अधिकारीले भरेका छन्। त्यस्तै अर्को गीतमा ओम सुनारको संगीत, दिपेन्द्र खड्का शब्द तथा संगीत रहेको छ । गीतमा नृत्य निर्देशन भने अबी वाग्लेको रहेको छ जस्मा अभिनय सन्जित भण्डारी, सोनी बिसी, याङ्शु श्रेष्ठ र आरती आचार्यको रहेको छ ।
चलचित्रलाई निर्देशक मदन घिमिरेले निर्देशन गरिरहेका छन भने चलचित्रमा सञ्जीत भण्डारी, सञ्जय खतिवडा, आरती आचार्य, रिचा थापा, पुनम गौतम, सान अधिकारी, सोनी बिसी, जोया बुढाथोकी, रुपा केसी, मुकुन्द थापा, कनिज कोइराला, याङ्सु श्रेष्ठ, पुष्कर राउत, बिन्दीया ठकुरी, रमेश तामाङ, राजाराम गौतम, गोकुल सुवेदी, सरोज दाहाल लगायतको अभिनय रहने छ । चक्र घर्ती निर्माता रहेको चलचित्रमा सुरेश अधिकारीको संगीत, प्रेम चुल्ठेको द्वन्द, कमल राईको नृत्य निर्देशन तथा रामशरण उप्रेतीको छायांकन रहनेछ ।
