नेपालगन्ज । बसन्त सापकोटाको संगीत र शब्दमा ‘तिम्रै हुन मन लाग्यो’ गीतको भिडियो सार्वजनिक भएको छ । गीतमा स्वर गायिका मेलिना राईले दिएकी छिन् । भिडियोमा गायक तथा कलाकार प्रकाश सपुत र नायिका मिरुना मगरले अभिनय गरेका छन् ।
‘तिम्रै हुन मन लाग्यो’ गीतको भिडियोलाई कैलाश राईको निर्माण गरेका हुन् । सिक्किमका व्यावसायी राईले यस अगाडी ‘मैं साबले’ जस्तो सफल गीतको भिडियो निर्माण गरेका थिए । यो भिडियो पनि सफल हुनेमा उनले शुक्रबार आयोजित प्रेसमिटमा विश्वास व्यक्त गरे । कार्यक्रममा बसन्त, प्रकाश र मिरुनाले अडियो तथा भिडियो राम्रो बनेको भन्दै दर्शकको साथ मिल्ने आशा राखे ।
बन्दीपुरमा पाहुना बनेर पुगेका प्रकाश र उनको स्वागतमा नृत्य गर्ने मिरुनाको जोडी भिडियोमा सुहाएको छ । देबेन्द्र बब्लुको निर्देशनमा बनेको भिडियोलाई अनिल के.मानन्धरले खिचेका हुन् भने सम्पादन प्रविण भट्टको छ ।
